மிஷ்கின் தற்போது ‘ பிசாசு’ என்ற படத்தை இயக்குகிறார். இயக்குனர் பாலாவின் B ஸ்டூடியோஸ் தயாரிக்கும் ‘பிசாசு’ படத்தின் பகுதிகள் பெருமளவு முடிந்து விட்டது.
இந்த படத்தை பற்றி இயக்குனர் மிஷ்கின் கூறும் போது ‘நீண்ட நாட்களாகவே எனக்கு ஒரு திகில் படம் இயக்க வேண்டும் என்று விருப்பம்.ரசிகர்களை வெறுமென பயமுறுத்துவது மட்டுமே திகில் படம் அல்ல என்பது என்னுடைய கருத்து ஆகும். பிசாசு பயமுறுத்தும் விஷயம் மட்டும் இல்லை , மனதை வருடும் விஷயம் கூடத்தான்.
இந்த படத்துக்கான முக்கிய கதாபாத்திரங்கள் மட்டுமின்றி மற்ற சிறிய பாத்திரங்களுக்கு கூட நான்கு மாதம் பயிற்சிக் கொடுத்து நடிக்க வைத்து உள்ளேன். இந்த படத்தில் மூத்த நடிகர் ராதா ரவி சார் மிகவும் முக்கியமான கதாபாத்திரத்தில், வித்தியாசமாக நடித்து உள்ளார். கதாநாயகனாக அறிமுகம் ஆகிறவர் நாகா. கதாநாயகியாக அறிமுகம் ஆகிறவர் பிரயாகா; கேரளாவில் இருந்து வந்து இருக்கும் அவர் நடன கலைகளில் வல்லவர். 60 அடிக்கும் மேல் உயரத்திலிருந்து ஒரு இரவு முழுவதும் பிசாசாக பறந்து நடித்திருக்கிறார்.
ஒளிப்பதிவாளர் வைட் ஆங்கிள் ரவிசங்கர் இந்த படம் மூலம் ரவி ராய் என்ற பெயரில் வித்தியாசமான கோணங்களில் காட்சிகளை படம் பிடித்து உள்ளார். ஆர்ரல் கார்ரலி என்ற புதிய இசையமைப்பாளரை இந்த படத்தில் அறிமுகபடுத்துகிறேன்.
பிசாசு படத்தின் உயிர் நாடி க்ளைமாக்ஸ் காட்சிதான். ஹாலிவுட் படங்களில் ஸ்டண்ட் இயக்குனராக பணியாற்றிய டோனி ஸ்டண்ட் காட்சிகளை அமைத்திருக்கிறார். புதுமுகங்களை வைத்து படமெடுத்தாலும் பட்ஜெட் பெரிது. அந்த சுதந்திரத்தை எனக்கு அளித்த எனது நண்பரும் தயாரிப்பாளருமான பாலாவுக்கு கடமைப்பட்டு இருக்கிறேன்.