கவுதம் மேனன் இயக்கத்தில் வேட்டையாடு விளையாடு படத்தில் நடித்த கமல், மீண்டும் அவர் இயக்கும் படத்தில் நடிக்க உள்ளதாக கூறப்படுகிறது. கடந்த இருவாரங்களுக்கு முன்னர் துவங்கிய கமல், கவுதம் மேனன் சந்திப்பு தொடர்ந்து நிகழ்ந்து வருவதால் இப்படம் பற்றிய அறிவிப்பை மிக விரைவில் எதிர்பார்க்கலாம்.
கமல்ஹாசன் நடித்து 2006-ல் திரைக்கு வந்த படம் “வேட்டையாடு விளையாடு”. இந்த படத்தில் நாயகியாக ஜோதிகா நடித்து இருந்தார். மேலும் கமாலினி, பிரகாஷ்ராஜ், டேனியல் பாலாஜி ஆகியோரும் முக்கிய கதாபாத்திரங்களில் வந்தனர். ஹாரிஸ் ஜெயராஜ் இசையில், ‘பார்த்த முதல் நாளே பாடல்’ வரவேற்பை பெற்றது. கவுதம் மேனன் இயக்கியிருந்த இப்படம் நல்ல வசூல் பார்த்தது.
தற்போது அதன் இரண்டாம் பாகத்தை எடுக்க முயற்சிகள் நடப்பதாக தகவல் வெளியாகி உள்ளது. சமீபத்தில் கமல்ஹாசனை இயக்குனர் கவுதம் மேனன் சந்தித்து பேசினார். அப்போது வேட்டையாடு விளையாடு படத்தின் இரண்டாம் பாகத்தை எடுப்பது குறித்து ஆலோசித்ததாக கூறப்படுகிறது. மேலும் இப்படத்தை வேல்ஸ் பிலிம் இண்டர்நேஷனல் சார்பில் ஐசரி கணேசன் தயாரிக்க உள்ளதாக சொல்லப்படுகிறது. ராஜு முருகன் இயக்கத்தில் வெளியான ‘ஜிப்ஸி’பட பிரிவியூவில் கவுதம் மேனனும் கலந்துகொண்டார் என்பது குறிப்பிடத்தக்கது.