ராயன் படத்தின் வெற்றியால் தனுஷுக்கு இரட்டிப்பு உற்சாகம். நடிகராக மட்டுமின்றி இயக்குநராகவும் அவர் வெற்றி பெற்றதால் இரட்டிப்பு மகிழ்ச்சி.
அதே வேகத்தில் அவர் இயக்குநராக மட்டும் பணியாற்றியிருக்கும் நிலவுக்கு என் மேல் என்னடி கோபம் படத்தை வெளியிடும் வேலைகளில் இறங்கியிருக்கிறார்.
அதோடு, போர்த்தொழில் பட இயக்குநர் விக்னேஷ் இயக்கத்தில் ஒரு படத்தையும் அவரே இயக்கி நாயகனாகவும் நடிக்கும் படம் ஒன்றையும் தொடங்கும் வேலைகளில் இறங்கியிருக்கிறார் என்று சொல்லப்படுகிறது.
இவற்றில், போர்த்தொழில் இயக்குநர் விக்னேஷ் உடன் அவர் இணையும் படத்தை வேல்ஸ் ஃபிலிம் இண்டர்நேசனல் நிறுவனம் சார்பாக ஐசரிகணேஷ் தயாரிக்கவிருக்கிறார் என்று சொல்லப்படுகிறது.
தனுஷே இயக்கி நடிக்கும் படத்தை ஆகாஷ் என்பவர் தயாரிக்கவிருக்கிறார்.
இவ்விரு படங்களின் திரைக்கதை உருவாக்கம் மற்றும் நடிகர்கள் தேர்வு உள்ளிட்ட படப்பிடிப்புக்கு முந்தைய பணிகள் நடந்து கொண்டிருக்கின்றன.
இவற்றில் தனுஷ் இயக்கும் படத்தின் படப்பிடிப்பு விரைவில் தொடங்கவிருக்கிறது என்கிறார்கள்.
அந்தப் படத்தில் ஒரு முதன்மையான வேடத்தில் நடிக்கக் கேட்டு அருண்விஜய்யை அணுகியிருக்கிறார் தனுஷ்.
அவரும் தனுஷ் சொன்ன கதை அதில் அவருடைய கதாபாத்திரம் ஆகிய விவரங்களைக் கேட்டு அவை சரியாக இருந்ததால் நடிக்க ஒப்புக்கொண்டிருக்கிறாராம்.
என்னை அறிந்தால் படத்துக்குப் பிறகு தமிழில் பிற கதாநாயகர்களின் படங்களில் நடிக்கக் கேட்டு நிறைய அழைப்புகள் அருண்விஜய்க்கு வந்திருக்கிறது.
அவற்றையெல்லாம் மறுத்து வந்த அருண்விஜய், தனுஷ் சொன்ன கதை மற்றும் கதாபாத்திரம் பிடித்துப் போய் நடிக்க ஒப்புக்கொண்டிருக்கிறார் என்று சொல்லப்படுகிறது.
அதோடு அவர் கதாநாயகனாக நடித்து வாங்கும் சம்பளத்தை விட இப்படத்தில் சம்பளம் அதிகம் என்றும் சொல்லப்படுகிறது.
இந்தக் காரணங்களால் தனுஷ் அழைப்பை அருண்விஜய் ஏற்றுக் கொண்டார் என்றும் இதுகுறித்த அறிவிப்பு விரைவில் வெளியாகும் என்றும் சொல்லப்படுகிறது.
இயக்குநர் பாலா இயக்கத்தில் அருண்விஜய் நடித்திருக்கும் வணங்கான் படம் விரைவில் வெளியாகவிருக்கிறது.
அதற்கடுத்து மான்கராத்தே திருக்குமரன் இயக்கத்தில் அருண்விஜய் நடிக்கும் ரெட்டதல படத்தில் நடித்துக் கொண்டிருக்கிறார்.
அப்படத்தின் படப்பிடிப்பு முடிவடைந்ததும் தனுஷ் படத்தின் படப்பிடிப்பில் கலந்து கொள்வார் என்று சொல்கிறார்கள்.