தயாரிப்பாளர் மற்றும் இயக்குநரின் சொல்கேளாமல் ‘மயிரே போச்சு’என தனது நீண்ட முடியை வெட்டி இரு படங்களை சோதனைக்குள்ளாக்கிய மலையாள நடிகர் ஷேன் நிகாம் விக்ரமின் புதிய படத்தில் ஒப்பந்தமாகியுள்ளார்.
இஷக், கும்பளங்கி நைட்ஸ் உள்ளிட்ட மலையாள படங்களில் நடித்து பிரபலமானவர் இளம் கதாநாயகன் ஷேன் நிகம். இவர் நடித்த படங்கள் அடுத்தடுத்து ஹிட்டானதால், அடுத்ததாக நடிக்க இருந்த வெயில், குர்பானி படங்களுக்கு அதிக சம்பளம் கேட்டுள்ளார். அதற்கு தயாரிப்பாளர் மறுப்பு தெரிவித்ததால், அப்படத்திற்காக நீண்ட வளர்த்த தனது தலைமுடியை வெட்டி அதிர்ச்சி அளித்தார். இதனால் அவர் நடித்துவரும் வெயில், குர்பானி படங்கள் கைவிடப்பட்டன. இந்த விவகாரம் மலையாள திரையுலகில் பெரும் பரபரப்பை ஏற்படுத்தியுள்ளது.
இந்த பிரச்சினை குறித்து ஆலோசிக்க மலையாள தயாரிப்பாளர் சங்கத்தின் அவசர ஆலோசனை கூட்டம் நடந்தது. கூட்டத்துக்கு பின் நிருபர்களுக்கு பேட்டி அளித்த நிர்வாகிகள் ஷேன் நிகம் நடிக்கும் படங்களுக்கு ஒத்துழைப்பு அளிக்க மாட்டோம். அவர் நடித்துவரும் வெயில், குர்பானி படங்கள் கைவிடப்படுகின்றன. அந்த படங்களுக்கு செலவழித்த ரூ.7 கோடியை ஷேன் நிகம் திரும்ப தர வேண்டும் என்று கூறினர்.
இந்நிலையில், அஜய் ஞானமுத்து இயக்கத்தில் விக்ரம் நடித்துவரும் படத்தில் ஷேன் நிகம் முக்கிய கதாபாத்திரத்தில் நடிக்க ஒப்பந்தமாகியுள்ளதாக தகவல் வெளியாகியுள்ளது. இவர் நடிக்க உள்ள காட்சிகள் ரஷ்யாவில் படமாக்க உள்ளதாக கூறப்படுகிறது. இதன்மூலம் இவர் தமிழ் திரையுலகில் அறிமுகமாக உள்ளார்.
ஆக்ஷன், திரில்லர் என முற்றிலும் மாறுபட்ட கதை அம்சத்தோடு மிகப் பிரம்மாண்டமாக தயாராகும் இப்படம் தமிழ், தெலுங்கு, ஹிந்தி என மூன்று மொழிகளில் உருவாக இருக்கிறது. 2020-ம் ஆண்டு ஏப்ரல் வெளியாகும் என்று எதிர்பார்க்கப்படுகிறது. இப்படத்திற்கு அமர் என தலைப்பு வைக்கப்பட்டுள்ளதாக சமூக வலைதளங்களில் தகவல் பரவி வருகிறது.