பாலிவுட்டின் முன்னணி நட்சத்திர நடிகரான அமீர்கான், அவரது கனவு படைப்பான ‘லால் சிங் சத்தா’ எனும் திரைப்படத்தை, இந்தியா முழுவதும் அனைத்து தரப்பு பார்வையாளர்களையும் சென்றடைய செய்வதற்கான அனைத்து முயற்சிகளையும் மேற்கொண்டிருக்கிறார். அதனடிப்படையில் உதயநிதி ஸ்டாலினின் ரெட் ஜெயன்ட் மூவிஸ் ‘லால் சிங் சத்தா’ படத்தை தமிழில் வழங்குவதுடன், தமிழகம் முழுவதும் வெளியிடுகிறது.
இந்த திரைப்படம் ஆகஸ்ட் 11ஆம் தேதியன்று உலகம் முழுவதும் வெளியாகிறது.
உதயநிதியின் ரெட்ஜெயண்ட் மூவிஸ் நிறுவனம், தொடக்கத்திலிருந்து தமிழ் சினிமாவிற்கு பொருத்தமான மற்றும் முக்கியமான திரைப்படங்களை தேர்ந்தெடுத்து வழங்கி வருகிறது. இந்த பட்டியலில் அமீர்கானின் ‘ லால் சிங் சத்தா’வும் இணைந்திருக்கிறது.
அமீர்கானின் ‘லால் சிங் சத்தா’ படத்தின் முன்னோட்டம் வெளியாகி, சாதனை படைத்து வருகிறது.
அவரின் உலக அளவிலான ரசிகர்கள், அவரது கதாப்பாத்திரத்தை திரையில் காண ஆவலுடன் காத்திருக்கிறார்கள். இப்படத்தின் பாடல்களும் வெளியாகி, இணையத்தில் பெரிய அதிர்வை ஏற்படுத்தி, ட்ரெண்டிங்கில் தொடர்ந்து இருக்கிறது. மேலும் படக்குழுவினர், படத்தின் ஆத்மார்த்தமான உணர்வை தாங்கியிருக்கும் பாடல்களை வெளியிட்டிருக்கிறார்கள். இந்த இசையில் பங்களிப்பை வழங்கியிருக்கும் பாடலாசிரியர்கள், இசைக்கலைஞர்கள், இசையமைப்பாளர் உள்ளிட்ட தொழில்நுட்பக் கலைஞர்களின் உழைப்பு இன்று பொதுவெளியில் பேசுபொருளாக மாறியிருக்கிறது.
அமீர்கான் புரொடக்ஷன்ஸ் சார்பில் தயாரிப்பாளர் கிரண் ராவ் மற்றும் வயாகம் 18 ஸ்டுடியோஸ் நிறுவனம் தயாரித்திருக்கும் ‘லால் சிங் சத்தா’ படத்தில், அமீர்கானுடன் கரீனா கபூர் கான், மோனா சிங், சைதன்யா அக்கினேனி ஆகியோரும் நடித்துள்ளனர். இந்தத் திரைப்படம் ஆங்கிலத்தில் வெளியான ‘ஃபாரஸ்ட் கம்ப்’ எனும் படத்தின் அதிகாரப்பூர்வ ரீமேக்காகும். உலகின் அத்தனை ஜீவன்களையும் ஒருசேர ஈர்த்த மிக முக்கியமான படம் இந்த ஃபாரஸ்ட் கம்ப் என்பது குறிப்பிடத்தக்கது.
1994 ம் ஆண்டு வெளியாகி சிறந்த நடிகர், சிறந்த இயக்குநர் உட்பட 7 ஆஸ்கார் விருதுகளையும் எட்டு கோல்டன் குளோப் விருதுகளையும் வென்ற ஃபாரஸ்ட் கம்ப் படத்தை ராபர்ட் ஜெமிக்கிஸ் இயக்கியிருந்தார். ஆஸ்கார் விதிகளில் ஒரே நடிகருக்கு அடுத்தடுத்த ஆண்டுகளில் சிறந்த நடிகர் விருது வழங்கப்படுவதில்லை. முந்தைய ஆண்டு தனது ‘ஃபிலடெல்பியா’ படத்துக்காக சிறந்த நடிகருக்கான விருதை வென்ற டாம் ஹேங்க்ஸ் அந்த விதியினை முறியடித்து அடுத்த ஆண்டும் ‘ஃபாரஸ்ட் கம்ப்’படத்துக்காக சிறந்த நடிகருக்கான விருதை வென்றார் என்பது சரித்திரம்.
