நடிப்பில் தேசிய விருதுகள் வாங்கியிருக்கும் கமல்,மம்முட்டி, மோகன்லால்களை விடவும் இன்றைக்கு இந்தியாவில் சிறந்த நடிகர் பிரதமர் மோடிதான். எனவே சிறந்த நட்கருக்கான தேசியவிருதை இனி அவரே பெற்றுக்கொள்ளலாம்` என்று மோடியை கிழித்து தொங்கவிட்டார் நடிகையும் காங்கிரஸ் கட்சியின் தேசிய செய்தித்தொடர்பாளருமான குஷ்பு.
கேரள மாநிலம் கோழிக்கோடு நகரில் நடந்த கேரள மாணவர் சங்க நிகழ்ச்சியில் கலந்துகொண்ட குஷ்பு பேசுகையில், “மோடி ஒருபோதும் சொல்வதை செய்வதில்லை. டிவிட்டரில் பிறந்த நாள் வாழ்த்து அனுப்புவது போன்ற விளையாட்டு காரியங்களில் மட்டும்தான் அவர் ஈடுபட்டு வருகிறார்.
இன்றைய தேதிக்கு இந்தியாவின் மிகச்சிறந்த நடிகர் மோடிதான். கமல்ஹாசன், மோகன்லால், மம்முட்டி போன்ற நடிகர்களைவிட பெரிய நடிகர் நரேந்திர மோடி. முந்தைய ஆட்சியில் பிரதமர் மன்மோகன்சிங், மவுன மோகன் சிங்காக இருப்பதாக மோடி குற்றம் சாட்டினார். ஆனால் முக்கிய பிரச்சினைகளின்போது மோடியும் அப்படித்தான் இருக்கிறார்.
தாத்ரி பிரச்சினையில், பாஜக தலைவர்கள் சர்ச்சை கருத்துக்களை கூறியபோதும், மோடி வாய் திறக்கவில்லை. இப்போது தேர்தல் நடத்தப்பட்டால், காங்கிரஸ் கட்சிதான் ஆட்சியை பிடிக்கும். பா.ஜ.க. இந்த நாட்டுக்காக தியாகம் செய்யவில்லை. காந்தியைக் கூட மகாத்மாவாக ஏற்காமல் கோட்சேவை தியாகி என்கிறது அக்கட்சி.
இன்னொரு பக்கம் ரூ.1 லட்சம் கோடி செலவில் புல்லட் ரயில் கொண்டுவருவதாக கூறும் மோடி கோடிக்கணக்கான மக்கள் கூரை இல்லாத வீட்டில் குடியிருப்பதை மறந்துவிட்டார்“ இவ்வாறு குஷ்பு பேசினார்.
மம்முட்டி, மோகன்லால், கமல் ரசிகர்களிடமிருந்து குஷ்புவின் கருத்து சரிதானா என்பது குறித்து கமெண்ட்கள் எதிர்பார்க்கிறோம்.