லெஜெண்ட் சரவணன் முதன்மை வேடத்தில் நடிக்கும் ‘லீடர்’ படத்தின் டீசர் வெளியீட்டு கொண்டாட்டம் சென்னை கமலா திரையங்கில் மார்ச் 5 வியாழக்கிழமை படக்குழுவினர் மற்றும் இரசிகர்கள் பங்கேற்க விமரிசையாக நடைபெற்றது.நடிகர்கள் ஷாம்,சந்தோஷ் உட்பட பலர் இந்நிகழ்வில் கலந்து கொண்டு படத்தைப் பாராட்டிப் பேசினர்.
இயக்குநர் ஆர்.எஸ்.துரை செந்தில்குமார் எழுதி இயக்கியுள்ள இந்தப்படத்தை லெஜெண்ட் சரவணா ஸ்டோர்ஸ் புரொடக்ஷன்ஸ் நிறுவனம் தயாரித்துள்ளது.
இந்தப் படத்தில் பாயல் ராஜ்புத் கதாநாயகியாக நடிக்கிறார், ஷாம், ஆண்ட்ரியா ஜெரேமியா, லால், பிரபாகர், அம்ரிதா ஐயர், விடிவி கணேஷ் மற்றும் பலர் முக்கிய வேடங்களில் நடிக்கின்றனர்.
ஜிப்ரான் வைபோதாவின் இதயம் தொடும் இசை,ஒளிப்பதிவாளர் எஸ்.வெங்கடேஷின் அற்புதமான கேமரா கோணங்கள்,பிரதீப்இ.ராகவின் விறுவிறு படத்தொகுப்பு மற்றும் மகேஷ் மேத்யூவின் பரபரப்பான சண்டைக் காட்சிகளுடன், ஆக்ஷன், சஸ்பென்ஸ் மற்றும் பொழுதுபோக்கு அம்சங்கள் நிறைந்த முழுமையான படமாக, ‘லீடர்’ இருக்கும் என்று படக்குழுவினர் தெரிவிக்கின்றனர்.
தூத்துக்குடி, ஜெய்ப்பூர், ஊட்டி, ஜார்ஜியா மற்றும் சென்னை உள்ளிட்ட பல இடங்களில் படமாக்கப்பட்டுள்ளது.
தமிழ், தெலுங்கு, மலையாளம், கன்னடம் மற்றும் இந்தி ஆகிய மொழிகளில் வரும் ஏப்ரல் மாதம் உலகெங்கும் உள்ள திரையரங்குகளில் ‘லீடர்’ வெளியாகிறது.
இந்நிலையில், ஒரு நிமிடம் 21 நொடிகள் ஓடும் டீசர் வெளியாகியுள்ளது.அந்த டீசரில் இடம் பெற்றுள்ள லெஜெண்ட் சரவணனின் அதிரடி சண்டைக்காட்சிகள் இரசிகர்களை உற்சாகப்படுத்தியுள்ளதோடு, சமூக ஊடக தளங்களில் பலத்த பாராட்டுகளைக் குவித்துள்ளன. படத்தின் மீதான எதிர்பார்ப்பை டீசர் பெரிய அளவில் அதிகரித்துள்ளது.
படத்தைப் பற்றி இயக்குநர் ஆர்.எஸ்.துரை செந்தில்குமார் பேசியதாவது…..
அசாதாரண சூழ்நிலைகளை எதிர்கொள்ளும் ஒரு சாதாரண மனிதனின் உணர்ச்சிப் பயணம்தான் லீடர்.தனது மகளுக்காக என்ன வேண்டுமானாலும் செய்யத் துணியும் ஒரு தந்தையைச் சுற்றி கதை சுழல்கிறது. இன்றைய பார்வையாளர்களை மனதில் கொண்டு, சிலிர்ப்பூட்டும் உணர்ச்சிபூர்வமான படமாக இதை உருவாக்கி உள்ளோம்.டீசர் ஒரு சாம்பிள் மட்டுமே.படத்தில் இன்னும் நிறைய இருக்கிறது.முதல்பார்வை மற்றும் கிளிம்ப்சுக்கு அமோக வரவேற்பளித்த இரசிகர்கள் டீசரையும் பாராட்டி வருகிறார்கள், அவர்களுக்கு என் மனமார்ந்த நன்றி.’லீடர்’ அனைவரையும் கவரும் என்று நம்புகிறேன் என்றார்.
